Co far gudogns?
En general faschais Vus in gudogn, sche Vus vendais in'aczia per in pretsch pli aut che quel che Vus avais pajà per l'aczia. Ma era per il commerzi virtual vala: mantegnai il sang fraid!
Na cumprai betg las aczias per l'emprima offerta!
Faschai era ina giada in'incumbensa da cumprar che na correspunda betg a l'offerta da vendita la pli bassa (colonna "Offerta"). Betg tut quai ch'ins po cumprar immediat è era favuraivel. Sche Vus pudais cumprar in'aczia per 12 Ex, faschai amogna 11.5 e spetgai! I dat adina auters martgadants che na crain betg en questa aczia e la vendan per in pretsch pli bunmartgà.
Tip: igl è meglier da spetgar in mument che da pajar memia bler.
Tric: cliccai sin l'abreviaziun da l'aczia per arrivar al cudesch d'incumbensas. Là na vesais Vus betg mo la meglra offerta, mabain era la segund fin quart meglra offerta. Uschia pudais Vus calcular meglier quant che Vus vulais inditgar sco pretsch da cumpra en Vossa incumbensa.
Vender aczias
Na laschai betg As influenzar memia fitg dals curs. Sche Vus pensais ch'ina aczia saja survalitada, nizzegiais Vus la chaschun. Tge faschais Vus pia? Correct: vender!
Uschia pudais Vus As concentrar sin aczias ch'èn fin ussa vegnidas resguardadas memia pauc e ch'èn uschia forsa pli bunmartgadas da cumprar.
Tip: sche Vus gudagnais 1 Ex cun bleras quotas d'ina aczia bunmartgada è quai anc adina meglier che 1 Ex cun paucas quotas d'ina aczia pli chara.
Tric: resguardai perquai las aczias favuraivlas. Ina midada dal curs po purtar fitg blers daners, sche Vus cumprais a temp in'aczia tschertgada.
Prelevar chapital 1
Vus essas sin il martgà e remartgais il suandant: la summa da las valurs en la colonna "Incumbensas da cumprar" ("Bid") è pli auta che quai che Vus stuais pajar per in pachet a la banca. Considerai: ils pachets vegnan adina offerts per in pretsch fix ed ils gudogns vegnan a la fin distribuids exactamain tenor questa valur. Sch'ils auters porschan memia bler pudais Vus far in gudogn!
Empruvai ina giada il suandant: cumprai in pachet d'aczias. Vus avais uschia obtegnì da mintga aczia d'in martgà in'ulteriura aczia. Ussa vendais Vus quellas ad auters martgadants e la differenza tutga a Vus.
Tip: Vus stuais agir svelt - ils auters na dorman betg! Sche Vus essas memia plaun, poi esser che Vus na vegnis betg da vender Vossas aczias
Tric: guardai l'emprim tgenin ch'è il pli pitschen dumber d'aczias ch'insatgi vul cumprar e cumprai gist tants pachets, ils quals Vus vendais alura gist puspè. Sche Vus cumprais numnadamain dapli ch'il surpli sin il martgà, alura na faschais Vus nagin gudogn.
Prelevar chapital 2
Tut quai funcziuna sa chapescha era viceversa. Questa giada guardais Vus che la summa totala da las meglras offertas (colonna "Incumbensas da vender" - Ask) è pli bassa che la valur d'in pachet. Quai signifitgescha numnadamain ch'ils auters vendan las aczias memia favuraivlamain. E da quai profitais Vus!
Vus cumprais en in emprim pass las aczias bunmartgadas. Era qua vala puspè: betg cumprar dapli aczias che necessari. Alura vendais Vus quellas sco pachet a la banca e survegnis ina valur fixa per pachet. La fatschenta è terminada e Vus avais gia fatg in gudogn.
Tip: Vus pudais mo vender 95 pachets, sche Vus possedais era da mintga aczia 95 tocs. Magasinar na porta damai nagut!
Tric: savens chattais Vus ils dumbers ils pli bass tar las aczias las pli charas. Guardai perquai l'emprim là, avant che Vus repassais l'entira glista.
Esser online
Sin ils martgads da prognosas pudais Vus adina puspè profitar da bunas offertas, p.ex. sch'in auter martgadant dovra urgentamain daner contant e porscha perquai l'aczia correspundenta per in pretsch fitg favuraivel. Sche Vus essas online pudais Vus profitar da la chaschun.
Sche Vus guardais sperasvi mo mintga duas emnas ina giada per dar incumbensas, alura avais Vus mo pitschnas schanzas da far in gudogn.
Tip: pli savens che Vus guardais sperasvi e pli gronda ch'è la schanza da chattar ina buna offerta.
Tric: faschai ina pitschna glista da tut las aczias. Scrivai sper mintga aczia il pretsch che Vus vulais pajar. Uschia èsi simpel da cumparegliar e da martgadar svelt.