Annunzia e participaziun
Ins po s'annunziar da tut temp fin set dis avant la clusiun dal martgà. Suenter n'acceptain nus naginas novas annunzias pli. Excepziuns da questa reglamentaziun èn adina pussaivlas.
S'annunziar e giugar è gratuit. Da princip po mintgin sa participar al gieu. As annunziai
Remartga impurtanta: il pled-clav survegnis Vus via e-mail. Faschai perquai attenziun d'inditgar correctamain Vossa adressa, cura che Vus As annunziais.
Persunas emploiadas da BDF-net, dals sponsurs resp. dals incumbensaders dals martgads da prognosas pon sa participar al gieu, na dastgan però betg acceptar eventuals premis.
Daners da gieu
La participaziun è gratuita. Mintga participant survegn a l'entschatta ina summa virtuala. La finamira è da multiplitgar quel cun martgadar a moda raffinada.
Temps d'avertura
Il martgà da prognosas è avert 24 uras al di. Igl è da tut temp pussaivel da dar incumbensas da cumprar u da vender. Il curs sa sviluppa nuninterruttamain, uschia ch'il martgà è adina en moviment. Tut las transacziuns èn gratuitas. La clusiun dal martgà è inditgada en la descripziun individuala dal martgà che Vus chattais sut la survista.
Martgadar
En ina bursa da prognosas è mintga aczia ina resposta ad ina dumonda areguard in eveniment futur. Martgadar pon ins cun tut las aczias d'in martgà. Vus pudais cumprar u vender aczias.
La pagina centrala per tut las activitads da martgadar è il punct da navigaziun "Martgà". Qua èn enumeradas tut las aczias dal martgà. Per arrivar directamain a la surfatscha da martgadar da l'aczia correspundenta, pudais Vus cliccar sin il simbol "H" a l'entschatta da la lingia.
Vus pudais far differentas transacziuns:
1. cumprar u vender al martgà singulas aczias da/ad auters participants (cun cliccar sin il simbol "H", vesair sura).
2. cumprar da u vender a la banca in pachet d'aczias (mintgamai ina da tut las aczias enumeradas en in martgà). Questa opziun chattais Vus a la fin da mintga survista.
La banca venda da tut temp pachets d'aczias per in pretsch fix. Pachets d'aczias cuntegnan da mintga aczia precis ina. Durant l'entira durada dal martgà cumpra la banca era enavos ils pachets d'aczias per quest pretsch fix. En tscherts martgads n'èsi betg pussaivel da cumprar e vender pachets. Ils detagls chattais Vus en la descripziun dal martgà correspundenta.
Co martgadar cun aczias?
In'incumbensa da cumprar valaivla cumpiglia il dumber d'aczias, il pretsch e la durada da valaivladad da Vossa offerta da cumpra. Suenter che Vus avais dà l'incumbensa da cumprar vegn il chapital necessari bloccà e na stat betg pli a disposiziun a Vus per autras cumpras - danor sche Vus avais activà l'opziun "Overcommit". Alura pudais Vus era dar incumbensas che surpassan la summa totala da Voss chapital. Sch'il pretsch inditgà en in'incumbensa da cumprar è pli aut che la meglra offerta da vendita, alura vegn l'incumbensa exequida immediat per il pretsch da l'offerta da vendita.
L'incumbensa da vender vegn exequida immediat, sch'il pretsch inditgà en l'incumbensa da vender è pli bass che la meglra offerta da cumpra per l'aczia correspundenta. Las ulteriuras incumbensas vegnan ordinadas tenor l'autezza en glistas, uschia ch'in martgadant survegn adina l'offerta la pli favuraivla per el. La glista d'incumbensas d'ina aczia vesais Vus en la survista detagliada da la valur correspundenta (cliccai sin l'abreviaziun da l'aczia en la colonna "Partida" en la survista).
Rendaquint - la valur da las aczias
Cura ch'il martgà è serrà ed il resultat uffizial dal martgà publitgà cumpra la bursa enavos las aczias tenor la valur inditgada en la descripziun dal martgà.
Tge capita cura ch'il martgà è serrà?
Il martgà vegn serrà il termin fixà. A partir da quel mument n'èsi betg pli pussaivel d'influenzar il curs da las aczias. Las incumbensas da cumprar e da vender avertas vegnan stornadas ed ils gudogns dal martgà vegnan distribuids tenor il resultat final. Las valurs da recumpra da las singulas aczias chattais Vus en la descripziun dal martgà.