Registraziun e participaziun al gieu:

Ils martgads da prognosas èn ina plattafurma da gieu virtuala, nua ch'ils participants dal gieu pon cumprar e vender vaglias fictivas sco sin ina bursa. L'organisatur dal gieu administrescha gratuitamain il chapital virtual dal gieu. Cun la registraziun per participar als martgads da prognosas survegn il giugader ina summa da daners virtuala sin ses conto. Cun la registraziun accepta il congiugader las cundiziuns per in'annunzia.
La participaziun als martgads da prognosas pretenda ina registraziun. Per persuna è lubida mo ina registraziun. En cas da cuntravenziuns vegn bloccà il conto da gieu sin ils martgads da prognosas. Plinavant po l'administraziun dal gieu excluder da la participaziun giugaders che fan e/u han fatg indicaziuns falladas e/u inditgan e/u han inditgà in'identitad nunvaira. Per la registraziun ston las suandantas datas vegnir inditgadas a moda correcta e cumpletta: adressa dad e-mail, prenum e num.

Protecziun da las datas/approvaziun:

Il participant è d'accord che las datas persunalas vegnan registradas, memorisadas ed elavuradas cun metodas automaticas en il senn da la lescha federala davart la protecziun da las datas (LPD). Il congiugader dat ses consentiment explicit per la registraziun, memorisaziun ed elavuraziun da las datas persunalas ch'el ha inditgà, surtut il num, il prenum, l'adressa, la data da naschientscha e l'adressa dad e-mail.
Ils organisaturs dal gieu resp. administraturs da la pagina Web han il dretg d'elavurar u da laschar elavurar da terzas persunas las datas persunalas dals participants dal gieu en Svizra ed a l'exteriur, sche quai è necessari per il gieu, la connexiun e la funcziun da la pagina Web, sco era per las lavurs da perscrutaziun scientificas realisadas en connex cun il gieu resp. per l'agen diever en vista a novas bursas da prognosas. Il congiugader po da tut temp revocar en scrit il consentiment dà cun la registraziun.
L'organisatur dal gieu s'oblighescha explicitamain d'utilisar las datas registradas sulettamain per ils intents dal gieu, da las tractar a moda confidenziala e da ni dar vinavant las datas a terzas persunas, ni da multiplitgar ellas u da cumbinar ellas cun autras datas persunalas senza il consentiment dal participant dal gieu.
Il participant dal gieu è plinavant pront da prender encunter e-mails e telefons da l'organisatur dal gieu resp. da terzas persunas incumbensadas da la lescha federala da telecommunicaziun (LTC). Las datas principalas vegnan elavuradas cun metodas automaticas e na vegnan betg dadas vinavant senza il consentiment en scrit dal participant. La fin da stad vegnan probablamain in u dus instituts universitars a lantschar projects per evaluar scientificamain las bursas d'elecziuns. Per quel intent vegnan els a survegnir access a las datas da transacziun (datas da commerzi) anonimisadas da la banca da datas da pro:kons per analisar midadas dal curs da las aczias en relaziun cun il cumbat electoral. Eventualmain vegnan participants da la bursa d'elecziuns dumandads per e-mail da sa participar ad ina curta enquista.

Andament dal giù:

L'andament dal gieu s'orientescha a las reglas da gieu correspundentas. Ils participants pon cumprar da resp. vender ad auters participants dal martgà u a la banca virtuala aczias u pachets d'aczias per ils pretschs offerts durant la durada dal gieu. Tut las transacziuns fatgas en il rom dal gieu èn irrevocablas. Mintga revocaziun da transacziuns incumbensadas u fatgas è sclausa explicitamain. Ils participants dal gieu vegnan infurmads davart las transacziuns realisadas exclusivamain sur las funcziuns correspundentas da la pagina Web. Ni l'organisatur dal gieu ni l'administratur da la pagina Web na surpiglian la responsabladad per la correctadad e la realisaziun a temp da las singulas transacziuns incumbensadas ed exequidas e per l'effect giavischà. La suletta basa per la valitaziun da las aczias èn ils mecanissems dal martgà, surtut la dumonda e purschida sin il martgà primar e secundar. Ils participants pon da tut temp cumprar da resp. vender ad auters participants dal martgà aczias d'ina partida per il pretsch offert u cumprar da resp. vender a la banca virtuala portfolios da basa (pachets d'aczias) per il pretsch inditgà en las reglas da gieu. Sch'ina transacziun è realisada, na pon ins betg pli revocar ella.

Custs ed indemnisaziuns:

La participaziun al gieu è gratuita. Ils participants giogan cun daners virtuals/betg reals. Al participant dal gieu na resultan nagins custs cun la visita da la pagina Web, danor ils custs da connexiun cun l'Internet (custs da telefon, custs dal provider, etc.).

Responsabladad/dretgs:

Cun la registraziun renconuscha ed accepta il participant ch'el sa participescha ad in gieu sumegliant ad in gieu da bursa. En il gieu na vegnan martgadadas naginas participaziuns realas ad interpresas, mabain sulettamain participaziuns fictivas. Ils administraturs da la pagina Web e dal gieu n'èn betg responsabels per donns che sa resultan dal gieu u en connex cun la participaziun al gieu.
Sin fundament da las cundiziuns tecnicas e da las caracteristicas da l'Internet sco World Wide Web n'èsi actualmain betg pussaivel d'excluder dal tuttafatg sbagls tecnics. L'administratur dal gieu na garantescha perquai betg che la plattafurma è adina disponibla e/u en funcziun senza disturbis. Surtut è exclusa la responsabladad per tut ils donns chaschunads en consequenza da defects tecnics ed en connex cun l'accessibladad e la disponibladad da la pagina Web. L'organisatur na surpiglia nagina garanzia per ils resultats dal commerzi cun aczias e da la segirtad e correctadad da las infurmaziuns sin ed en connex cun la plattafurma (pagina Web).
L'organisatur dal gieu resp. da la pagina Web na garantescha ni per donns indirects ni per tut ils donns consecutivs, sco era betg per gudogns manchentads u datas persas. Sche l'administratur da la pagina Web u l'organisatur dal gieu duess malgrà la reglamentaziun preschenta stuair surpigliar ina responsabladad, sa restrenscha quella en tutta cas a donns chaschunads intenziunadamain u per greva negligientscha. La responsabladad per donns chaschunads tras negligientscha è en tutta cas exclusa.
Tut ils dretgs dal gieu, da la preschentaziun utilisada e da la software, n'emporta betg da tge gener, surtut però il dretg d'autur u eventuals dretgs colliads cun il dretg d'autur cumpetan exclusivamain a l'administratur dal gieu resp. a l'administratur da la pagina Web. Quest fatg renconuscha ed accepta il giugader.

Tscherna dal dretg e cunvegna davart la dretgira cumpetenta:

La via legala vegn exclusa en enclegientscha. Sch'i dat tuttina dispitas da u en connex cun ils martgads da prognosas, l'utilisaziun da la pagina Web u il manaschi dal gieu, è responsabla exclusivamain la dretgira cumpetenta a Turitg (Stadt Zürich).

Tut las eventualas relaziuns giuridicas en connex cun ils martgads da prognosas, surtut tranter ils administraturs da la pagina Web resp. l'organisatur dal gieu ed ils participants da la plattafurma suttastattan explicitamain al dretg svizra. Per dispitas da questas relaziuns giuridicas vala damai sulettamain il dretg svizra.