Abreviaziuns
k: incumbensa da cumprar
v: incumbensa da vender
bk: incumbensa da cumprar in pachet
bv: incumbensa da vender in pachet
ck: incumbensa da cumprar stornada
cv: incumbensa da vender stornada
cbk: incumbensa da cumprar in pachet stornada
cbv: incumbensa da vender in pachet stornada
ak: incumbensa da cumprar scadida
av: incumbensa da vender scadida
Aczia
In'aczia sin in martgà da prognosas represchenta ina resposta pussaivla a la dumonda dal martgà correspundent. Guardai era il chavazzin "Martgà".
Arbitragi
Gudogns d'arbitragi vegnan numnads sin il martgà da prognosas l'uschenumnada prelevaziun d'in martgà. Gudogns d'arbitragi pon ins cuntanscher, cura che las pli autas incumbensas da cumpra surpassan en lur summa la valita dal martgà a curta vista u cura che las incumbensas da vendita las pli bassas sutpassan en lur summa la valita dal martgà.
Exempel: La valita d'in martgà munta a 100. Per quest pretsch fix cumpra e venda la banca da tut temp pachets d'aczias (vesair era Martgà da pachets). Sche la summa da l'incumbensa da cumpra è a curta vista sur la valita dal martgà da 100, cumpra in commerziant pachets d'aczia da la banca e po puspè vender las aczias immediat cun gudogn. Sche la summa da l'incumbensa da vendita è a curta vistas sut 100, cumpra il commerziant questas aczias e las venda en in pachet e cun gudogn a la banca.
Ask
Il pretsch che vegn dumandà per in'aczia. Guardai era il chavazzin "Offerta da vendita".
Bid
Il pretsch che vegn purschì per in'aczia. En il martgà vala "high bid" sco la pli auta offerta da cumpra actuala.
Cumenzament +/-
Questa cifra-clav mussa la midada en pertschients dal curs d'aczias actual en cumparegliaziun cun il curs al cumenzament dal martgà.
Chapital
A l'entschatta survegnis Vus per mintga plazza commerziala in tschert chapital en la valuta Ex. Quest chapital è dal tuttafatg virtual e nagina valuta uffiziala. Il chapital è necessari per valitar il martgà e per eruir Voss success sin ils martgads da prognosas.
Chart
Charts èn agid grafics che visualiseschan il svilup d'in martgà u d'ina aczia a moda survesaivla. Als martgads da prognosas mussan ils charts il svilup da la prognosa d'eveniment respectiva.
Commerzi
Il commerzi sco tal ha lieu sin la pagina «Detagls» d'ina plazza da martgà. Questa vista detagliada po vegnir endrizzada fix sco pagina da standard (checkbox). Cun cliccar sin «Aczia» u sin il «P» (per «prognosa») pon ins ussa cumprar e vender.
La pagina «Detagls» po vegnir visualisada tranter auter suandantamain:
- Davent d'ina pagina da martgà cun cliccar sin «Detagls».
- Davent da la pagina principala e da las sutpaginas directas cun cliccar sin la dumonda da martgà u d'aczia colliada.
- Davent d'ina pagina d'aczias cun cliccar sin «Survista dal martgà».
Tge pudais Vus far qua? Martgadar - cumprai aczias, cura ch'il curs As para bass. Vendai puspè ellas, cura che Vus pensais ch'il curs sa sbassia prest puspè. La differenza tranter il pretsch da cumpra e da vendita è Voss gudogn. Resguardai p.pl. la suandanta maxima: pli savens che Vus martgadais e pli grondas ch'èn las schanzas da far in gudogn. Vus faschais damain gudogns, sche Vus cumprais in'aczia a l'entschatta dal gieu e spetgais fin la clusiun dal martgà, empè d'adattar las investiziuns a la situaziun dal martgà.
Curs
Il curs da l'aczia correspunda adina al pretsch ch'è vegnì pajà per la davosa transacziun. Sin ils martgads da prognosas è il curs actual la prognosa per l'eveniment futur definì en il titel dal martgà.
Exempel: Sin in martgà che duai prognostitgar il resultat d'ina elecziun ha la partida X il curs 35. Quai signifitga: ils commerziants da quest martgà spetgan actualmain che la partida X survegnia il di da las elecziuns 35% da las vuschs.
Datas da rangaziun
Vus pudais decider sez/sezza, sche Vus vulais metter a disposiziun Vossas indicaziuns dal portfolio a Voss congiugaders u betg. Per render vesaivel Voss possess en daner contant resp. en aczias, As supplitgain nus d'activar la funcziun "Datas da rangaziun" sut "Configuraziuns".
Editar in'incumbensa
Editar in'incumbensa signifitga adattar in'incumbensa incorrecta. Incumbensas incorrectas pon anc vegnir curregidas, uscheditg che n'è vegnida fatga anc nagina fatschenta. Ins po editar ellas via la pagina da survista da las incumbensas (sin la pagina da martgà respectiva: «Incumbensas» en la chaschetta «Mes portfolio»).
Emna +/-
Questa cifra distinctiva mussa a Vus la differenza procentuala tranter il curs d'aczias actual ed il curs d'avant set dis.
Ex
Ex è la valuta virtuala da la bursa d'elecziuns.
Fracziunament d'aczias / divisiun d'aczias
Eventualmain po in'aczia vegnir fracziunada (partida) durant il temp ch'ella è sin il martgà per pudair metter ulteriuras aczias sin il martgà. Il pli savens vegn fracziunada l'aczia «Autras». Davos quella stattan usualmain ulteriuras respostas pussaivlas a la dumonda d'in martgà. Damai p.ex. partidas che candideschan, che n'èn però anc betg represchentadas cun in'atgna aczia al martgà.
Sch'ina aczia vegn fracziunada, vegn il commerzi mintgamai interrut curtamain (ca. ina minuta). En il fratemp vegn messa sin il martgà la nova aczia (per exempel Z) e l'aczia oriunda (U) vegn partida. Il proceder è da princip il suandant: mintga commerziant che posseda parts da l'aczia «U» il mument ch'ella vegn fracziunada, survegn supplementarmain la medema cumpart da l'aczia ch'è vegnida messa da nov sin il martgà.
Exempel: In commerziant posseda il mument che l'aczia vegn fracziunada 1500 tocs da l'aczia «U». La nova aczia «Z» vegn messa sin il martgà. Suenter il fracziunament posseda il commerziant en ses portfolio 1500 aczias «U» e 1500 aczias «Z».
Remartga: Cura che l'aczia «Autras» vegn fracziunada, vegnan allontanadas las suandantas incumbensas: incumbensas da cumpra u da vendita cun la durada «Allontanar l'incumbensa» (la durada «Allontanar l'incumbensa» è preselecziunada sco standard per mintga incumbensa endatada).
Incumbensa
Cun "incumbensa" è manegià qua in'incumbensa da cumprar u vender. Guardai era ils chavazzins "Offerta da cumpra" ed "Offerta da vendita".
Incumbensa nunvesaivla
Sche Vus avais dà in'incumbensa che surpassa Vossa summa en daners contants disponibels actualmain, alura resta nunvesaivla sin la surfatscha da commerzi quella part da l'incumbensa che Vus na pudais betg pajar en daner contant. Sche Voss possess en daner contant s'augmenta u sa sbassa en il fratemp, sa mida era la part da l'incumbensa nunvesaivla; Vus vesais tut tenor dapli u damain aczias.
Quest princip vala per las incumbensas da cumprar e da vender, sco era per la cumpra e la vendita da pachets.
Incumbensa vesaivla
Sche Vus avais dà in'incumbensa che surpassa Vossa summa en daners contants disponibels actualmain, alura vegn visualisà sin la surfatscha da commerzi mo quella part da l'incumbensa, che Vus pudais pajar en daner contant. Sche Voss possess en daner contant s'augmenta u sa sbassa en il fratemp, sa mida era la part da l'incumbensa vesaivla; Vus vesais tut tenor dapli u damain aczias.
Quest princip vala per las incumbensas da cumprar e da vender, sco era per la cumpra e vendita da pachets.
Istorgia
En la rubrica "Transacziuns" dal menu chattais Vus ina survista da Vossas transacziuns fatgas.
Martgà
Il martgà represchenta ina dumonda davart in eveniment futur. Las aczias da quest martgà correspundan a las respostas a questa dumonda.
Martgà (dumonda): Tge equipa gudogna?
Aczias (resposta): Equipa A, equipa B, etc.
Martgà da pachets
Sin in martgà da pachets na cumprais Vus betg ina singula aczia da la banca, mabain pachets d'aczias. Sche Vus cumprais in pachet sin ils martgads da prognosas, survegnis Vus da tut las aczias quotadas mintgamai ina. Il pretsch per in pachet resta il medem durant l'entira durada dal martgà ed è definì en la descripziun dal martgà correspundenta.
Offerta da cumpra
Sche Vus vulais cumprar aczias, stuais Vus l'emprim far in'offerta da cumpra. Cun cliccar sin il "H" s'avra la fanestra da commerzi. Là definis Vus il pretsch che Vus vulais pajar per las aczias, il dumber e fin cura che l'offerta è valaivla. Alura tramettais Vus l'incumbensa. Ils ulteriurs martgadants legian Vossa offerta e pon far a Vus in'offerta da vendita. Sch'il pretsch ed il dumber d'ina offerta da cumpra correspundan ad ina offerta da vendita, succeda il commerzi automaticamain e las aczias vegnan barattadas per ils daners.
Offerta da vendita
Sch'in martgadant vul vender aczias, sto el far in'offerta da vendita. In'offerta da vendita cumpiglia il dumber, il pretsch minimal ch'il vendider pretenda per sias aczias e la data, fin cura che l'offerta è valaivla. Sch'ina offerta da vendita na po betg vegnir accumplida u mo parzialmain, alura vegn ella integrada en la glista da spetga da tut las ulteriuras offertas da vendita avertas.
Guardai era il chavazzin "Ask".
Overcommit
Sche Vus avais activà la funcziun "Overcommit", pudais Vus era dar incumbensas da cumprar che surpassan Vossa summa da daners contants disponibels actualmain. Ev. vesais Vus alura però mo ina part da quella incumbensa. Sche Vus avais deactivà questa funcziun, pudais Vus mo dar incumbensas da cumprar en il rom da Voss possess en daner contant. Decisiva è en quest connex la summa da tut las incumbensas, betg la singula incumbensa. Quest princip vala tant per las incumbensas da cumprar e da vender, sco era per la cumpra e vendita da pachets. La funcziun "Overcommit" pudais Vus adattar da tut temp sut "Configuraziuns" - ordinà separadamain tenor singulas aczias u pachets.
Guardai era ils chavazzins "Incumbensa vesaivla" / "Incumbensa nunvesaivla"
Remartga: I vegnan pajadas mo incumbensas vesaivlas. Incumbensas nunvesaivlas, damai incumbensas che surpassan il cash che stat a disposiziun, scadan. Venditas a scuverta na pon betg vegnir fatgas cun la funcziun «Overcommit». La funcziun «Overcommit» è preselecziunada sco standard per mintga utilisader.
Pachets d'aczias
In pachet d'aczias sa cumpona da mintgamai in'aczia da tut las aczias quotadas sin il martgà.
Valurs da prognosas
Suenter ch'il martgà è serrà, vegnan visualisadas las suandantas valurs da prognosas sin ina pagina da martgà:
- ø 7 dis
- ø 3 dis
- ø 1 di
Las valurs respectivas inditgeschan la media dals pretschs da tut las aczias dals ultims 1, 3 resp. 7 dis avant la serrada dal martgà. Cumplementarmain vegn inditgà er il curs final.
Portfolio / Portefeuille
Grazia a «Mes portfolio» hai jau en in'egliada la survista da mes daner contant e da mia valur d'aczias investida. Cun cliccar sin «Aczias» vegnan visualisadas tut las aczias dal portfolio. Sut «Incumbensas» èn tut las cumpras e venditas enumeradas e sut «Transacziuns» vegn visualisada la cronologia da mia activitad da commerzi.
Rangaziun / Ranking
A la bursa da las elecziuns vegnan manadas duas differentas glistas da rangaziun:
- Il ranking dal martgà. I dat mintgamai in ranking per mintga plazza da martgà.
- Il ranking total. En la navigaziun principala «Glista da rangaziun» sut «Glista da rangaziun dals commerziants»
Supplementarmain vegn publitgà ina glista da rangaziun da l'activitad che mesira tut las activitads d'in commerziant (tranter auter era contribuziuns en il forum).
Datas da ranking
Vus pudais tscherner libramain, sche Vus vulais metter a disposiziun Vossas datas dal portfolio als congiugaders u betg. Per infurmar ils congiugaders davart Voss effectiv da daner contant resp. davart Voss effectiv d'aczias actual, activai p.pl. la funcziun «Datas da ranking» sut «Parameters».
Rangaziun dals commerziants (ranking total)
Il ranking total preschenta ils participants cun il pli grond success da tut ils martgads. En il ranking total èn vesaivels mo utilisaders che han almain in punct. La calculaziun sa basa sin il suandant princip:
Surdada da puncts:
Mintga utilisader obtegna per plazza da martgà in dumber da puncts che sa cumpona da duas parts: il dumber da puncts regular ed il bonus per ils trais primpremiads. Davart ils puncts che vegnan surdads regularmain decida il dumber da participants ad in martgà. En in martgà cun 100 u pli paucs participants vegnan surdads regularmain maximalmain 50 puncts. Ina dublegiada dal dumber d'utilisaders signifitga in auzament per 10 puncts:
0-100: 50 puncts
101-200: 60 puncts
201-400: 70 puncts
401-800: 80 puncts
euv...
L'emprim (tenor valur da deposit) obtegna il dumber da puncts maximal. L'ultim cun ina rendita positiva (almain 0,01 unitads monetaras dapli che quai ch'igl èn vegnidas distribuidas) obtegna in punct. Tranteren vegn interpolà linearmain (tenor rang) ed arrundà sin il proxim dumber entir. Utilisaders che n'han nagina rendita positiva survegnan 0 puncts. Ils trais primpremiads obtegnan puncts da bonus:
Emprim: 20 puncts
Segund: 10 puncts
Terz: 5 puncts
Performance:
I vegnan adidas las valurs da performance (en %) da las singulas plazzas da commerzi.
Performance totala:
Il gudogn cuntanschì sin tut las plazzas da commerzi vegn referì al chapital inizial total. I vegnan resguardads mo plazzas da commerzi, sin las qualas igl è vegnida realisada almain ina fatschenta regulara (vendita u cumpra).
Storno
Vus pudais stornar incumbensas dadas per sbagl, uschè ditg ch'i n'ha anc dà nagin commerzi. Ins po stornar ellas via la pagina da survista da las incumbensas (sin la pagina da martgà respectiva: «Incumbensas» en la chaschetta «Mes portfolio»).
Transacziun
Sch'in commerziant accepta in'incumbensa existenta da cumpra u da vendita, vegn fatga immediat in'uschenumnada transacziun – la fatschenta per propi. Mintga commerziant po far tantas transacziuns sco quai ch'el vul, uscheditg che ses chapital tanscha.
Sut il punct da menu «Transacziuns» vegnan enumeradas tut las transacziuns ch'in commerziant ha fatg en in martgà. Ins po chattar ellas mintgamai sin la pagina da martgà respectiva: «Transacziuns» en la chaschetta «Mes portfolio»).
Valur da recumpra
La valur che la banca paja per in'aczia il termin fixà tenor il resultat dal gieu.